Boroughs in Londen

London boroughs is die amptelike Engelse vakterm vir die 32 stadsdistrikte waarin Groter Londen vir administratiewe doeleindes verdeel word. Elkeen van die distrikte word deur 'n distriksraad of borough council bestuur.

Londen se distrikte is almal op 1 April 1965 volgens die Wet op die Londense regering van 1963 as plaaslike regeringsliggame gevorm, tegelykertyd met Groter Londen, toe vroeëre administratiewe eenhede saamgesmelt is. Twaalf van die distrikte, wat in die middestad van Londen geleë is, word amptelik Inner London boroughs genoem, terwyl na die twintig distrikte in die buitewyke van die Britse hoofstad as Outer London boroughs verwys word. Die grense van stadsdistrikte is sindsdien twee keer hersien – in 1987 en 1992 is daar klein wysigings aangebring.

Die bevolkingsgetalle van Londense stadsdistrikte varieer tussen sowat 150 000 en 300 000 en staan sodoende gelyk aan dié van tipiese Engelse stede. Distrikte in die binnestad is gewoonlik kleiner as dié in die buitewyke, sowel ten opsigte van hul bevolkingsgetal asook hul oppervlakte, maar word deur 'n hoër bevolkingsdigtheid gekenmerk.

Londen se boroughs en hul rade oefen administratiewe gesag oor die gebied van Groter Londen uit – met uitsondering van die City of London wat deur die City of London Corporation ('n liggaam wat lank voor die stigting van die boroughs bestaan het) en die Inner en Middle Temples geadministreer word. Die twee Temples is selfstandige enklawes in die City wat om historiese redes nie deur die City of London Corporation geadministreer word nie.


© MMXXIII Rich X Search. We shall prevail. All rights reserved. Rich X Search